BBC Trust

Gwelwyd y ffigurau uchaf mewn degawd o ran cynulleidfa ar BBC One Wales a BBC Two Wales yn 2013/14, yn ôl Adroddiad Blynyddol y BBC ac adolygiad blynyddol Cyngor Cynulleidfa Cymru o'r BBC a gyhoeddwyd heddiw.      

Gwelwyd hefyd y niferoedd uchaf erioed yn gwylio BBC Wales Today, y bwletin newyddion fin nos, gyda 305,000 o bobl yn ei wylio ar gyfartaledd.

Croesawodd Cyngor Cynulleidfa Cymru, corff cynghori Ymddiriedolaeth y BBC, lwyddiannau'r BBC yng Nghymru a'r uchafbwyntiau eleni o ran rhaglenni.  Ymhlith y rhain roedd Y Gwyll/Hinterland, a ddarlledwyd mewn tri fersiwn mewn partneriaeth â'r S4C – Cymraeg, dwyieithog a Saesneg – am y tro cyntaf i gynulleidfaoedd yng Nghymru ac yna ledled y DU.

Cyrhaeddodd tymor rhaglenni Live Longer Wales ar y teledu, radio ac ar-lein bron 40 y cant o oedolion yng Nghymru.  

Parhaodd BBC Wales i gyfrannu'n gadarn at raglenni i gynulleidfaoedd ledled y DU, gyda bron 12 miliwn o bobl, ar gyfartaledd, yn gwylio'r gyfres ddiweddaraf o Sherlock. Mae hyn yn golygu mai hon yw'r gyfres ddrama a gafodd y nifer fwyaf o wylwyr ar y BBC mewn dros ddegawd yn ogystal â'r ffaith mai hon yw'r ddrama fwyaf poblogaidd erioed ar BBC iPlayer. 

Cafodd y bennod arbennig o Doctor Who a oedd yn dathlu hanner canmlwyddiant y gyfres, a gynhyrchwyd hefyd yng Nghaerdydd, ei darlledu ar yr un pryd i 98 o wledydd ledled y byd.   

Parhaodd BBC Radio Wales i berfformio'n gadarn gyda 468,000 o bobl, ar gyfartaledd, yn gwrando bob wythnos.  Cynyddodd BBC Radio Cymru gyrhaeddiad ei gynulleidfa 13 y cant, lansiodd ymgynghoriad cyhoeddus helaeth ymhlith ei wrandawyr ac yn dilyn hynny ail-lansiodd ei amserlen yn ystod yr wythnos.

Croesawodd y Cyngor Cynulleidfa lansiad BBC One Wales HD ynghyd â'r gwelliannau diweddar i ddarpariaeth DAB o BBC Radio Wales a Radio Cymru, a gynyddodd o 41 y cant i 61 y cant.  

Mae'r Cyngor, a gynhaliodd 18 o ddigwyddiadau eleni i gasglu barn cynulleidfaoedd, wedi pwysleisio'r ffaith bod angen gwella darpariaeth DAB ac FM o Radio Wales a mynegodd bryder nad yw newyddion rhwydwaith BBC ledled y DU yn adlewyrchu'r DU ar ôl datganoli o hyd. Er i'r Cyngor ddod i'r casgliad bod rhywfaint o gynnydd wedi'i wneud, dywedodd fod cymariaethau annigonol yn cael eu gwneud o hyd o ran swyddi cyfreithiol ac o ran polisi yng ngwledydd gwahanol y DU. Pwysleisiodd y Cyngor hefyd bryderon y gynulleidfa am y gostyngiad parhaus yn nifer y rhaglenni teledu Saesneg nad ydynt yn ymwneud â'r newyddion a gynhyrchir gan BBC Wales i gynulleidfaoedd yng Nghymru, sydd wedi gostwng 21 y cant ers 2007/8.

Dywedodd Elan Closs Stephens, Ymddiriedolwr Cymru y BBC:

"Gyda'r ffigurau uchaf mewn deng mlynedd o ran cynulleidfa, mae'n amlwg bod BBC Cymru Wales yn darparu ar gyfer cynulleidfaoedd yng Nghymru ac mae'r rhaglenni eithriadol a welwyd dros y flwyddyn ddiwethaf yn brawf o hynny.   Yn ogystal â hyn, mae'r dramâu a wnaed yng Nghymru ar gyfer y DU gyfan yn mynd o nerth i nerth ac mae Radio Cymru wedi denu mwy o wrandawyr. 

"Fodd bynnag, mae'n peri pryder bod y Cyngor Cynulleidfa wedi nodi materion parhaus o ran y ffordd y mae rhwydwaith y BBC yn adlewyrchu Cymru, a'r ffaith bod prinder rhaglenni teledu Saesneg, yn arbennig comedi a drama, yn cael eu cynhyrchu yng Nghymru i Gymru.  Bydd yr Ymddiriedolaeth yn parhau i weithio gyda'r BBC i fynd i'r afael â'r pryderon hyn yn ystod y flwyddyn i ddod".

Nodiadau i Olygyddion